النشيد الوطني لجمهوريه مصر العربيه

بلادي بلادي بلادي، لك حبي وفؤادي
مصر يا أم البلاد، أنت غايتي والمراد
وعلى كل العباد، كم لنيلك من ايادي

مصر انت أغلى درة، فوق جبين الدهر غرة
يا بلادي عيشي حرة، واسلمي رغم الأعادي

مصر أولادك كرام، أوفياء يرعوا الزمام
سوف تحظي بالمرام، باتحادهم واتحادي

بلادي بلادي بلادي، لك حبي وفؤادي

حمل موسيقي النشيد : http://www.mediafire.com/?50v0fa5w166c759

وعلي رأي عم صلاح جاهين :

على اسم مصر التاريخ يقدر يقول ما شاء


أنا مصر عندي أحب وأجمل الأشياء


باحبها وهي مالكه الأرض شرق وغرب


وباحبها وهي مرميه جريحة حرب


باحبها بعنف وبرقة وعلى استحياء


واكرهها وألعن أبوها بعشق زي الداء


واسيبها واطفش في درب وتبقى هي ف درب


وتلتفت تلقيني جنبها في الكرب


والنبض ينفض عروقي بألف نغمة وضرب


على اسم مصر


النسيم في الليالي وبياعين الفل


ومرايه بهتانة ع القهوة .. أزورها .. واطل


القى النديم طل من مطرح منا طليت


والقاها برواز معلق عندنا في البيت


فيه القمر مصطفى كامل حبيب الكل


المصري باشا بشواربه اللي ما عرفوا الذل


ومصر فوق في الفراندة واسمها جولييت


ولما جيت بعد روميو بربع قرن بكيت


ومسحت دموعي في كمي ومن ساعتها وعيت


*****


مصر السما الفزدقي وعصافير معدية


والقلة مملية ع الشباك .. مندية


والجد قاعد مربع يقرا في الجرنال


الكاتب المصري ذاته مندمج في مقال


ومصر قدامه اكتر كلمة مقرية


قريتها من قبل ما اكتب اسمي بإيديا


ورسمتها في الخيال على أبدع الأشكال


ونزلت أيام صبايا طفت كل مجال


زي المنادي وفؤادي يرتجف بجلال


********


مصر .. التلات أحرف الساكنة اللي شاحنة ضجيج


زوم الهوا وطقش موج البحر لما يهيج


وعجيج حوافر خيول بتجر زغروطة


حزمة نغم صعب داخلة مسامعي مقروطة


في مسامي مضغوطه مع دمي لها تعاريج


ترع وقنوات سقت من جسمي كل نسيج


وجميع خيوط النسيج على نبرة مربوطة


اسمعها مهموسة والا اسمعها مشخوطه


شبكة رادار قلبي جوه ضلوعي مضبوطة